Ամերիկյան գրականության ինքնօրինակ դեմքերից մեկը, որն իրեն կապող օղակ էր համարում 50- ականների բիթ սերնդի և 60- ականների հիպիների միջև («Ես շատ երիտասարդ էի բիթնիկ լինելու և շատ տարեց հիպի լինելու համար»): 1957-ին ավարտել է Օրեգոնի համալսարանի լրագրության բաժինը, գրողի վարպետություն ուսանել Սթենֆորդի համալսարանում: Քիզիին վիթխարի համբավ բերեց «Թռիչք կկվաբնի վրայով» վեպը, որը 1962-ին լույս տեսնելուն պես միանգամից դասական գործի համարում ձեռք բերեց:
Հետագայում Քիզին գրեց ևս երեք վեպ, պատմվածքների և էսսեների ևս երեք ժողովածու, երկու պիես և երկու մանկական գիրք, բայց նրա ամենաճանաչված գործը մնաց «Թռիչք կկվաբնի վրայով» արտասավոր վեպը, որի տպաքանակը միայն ԱՄՆ-ում հասել է ավելի քան 8 միլիոն օրինակի: 1963-ին Դեյլ Ուոսերմանը հաջողությամբ բեմականացրեց վեպը, իսկ 1975-ին Միլոշ Ֆորմանն էկրանավորեց (5 «Օսկար» և 28 այլ մրցանակ): Փառքի կիզակետին Քիզին մեղադրվեց մարիխուանա պահելու համար, ինքնասպանություն բեմադրեց (իբր բեռնատարով գահավիժել է քարափից՝ հետմահու երկտող թողնելով), իսկ իրականում ընկերների մեքենայի բեռնախցիկում թաքնված փախավ Մեքսիկա, բայց ի վերջո Նահանգներ վերադառնալուց հետո 1965-ին բանտարկվեց հինգ ամսով: 60-ականների վերջին նա ընտանիքի հետ տեղափոխվեց Օրեգոնի հայրենի ագարակը և մեկուսանալով այնտեղ՝ գրեթե մինչև կյանքի վերջը ագարակապանի խաղաղ կյանք վարեց՝ գյուղատնտեսությամբ զբաղվելուն զուգահեռ շարունակելով գրելը: Քիզին վախճանվեց քաղցկեղից 66 տարեկանում:
Հեղինակից առկա գրքեր
Comments